ADYM.KZ / Қазақстан Президенті Қасым-Жомарт Тоқаев Бельгия Корольдігінің Ұлттық күніне орай Король Филиппке құттықтау жеделхатын жолдады.
Ақорданың мәліметінше, Мемлекет басшысы бұл мереке Бельгия халқының бірлігі мен ынтымағын айшықтайтын ерекше күн екенін атап өткен.
Президент өз құттықтауында Қазақстанның Бельгия Корольдігімен достық қарым-қатынасты одан әрі нығайтуға ерекше мән беретінін жеткізді. Сондай-ақ жақында Брюссельге жасаған сапары екіжақты ынтымақтастықты жаңа деңгейге көтеріп, өзара ықпалдастыққа тың серпін бергенін атап өтті.
Қасым-Жомарт Тоқаев Король Филипптің барлық игі бастамасына табыс тілеп, Бельгия халқына бейбітшілік, бақ-береке және өсіп-өркендеу тіледі.
