ADYM.KZ / Қазақстан құрамасының спортшысы Диана Ержанова Румынияның Изворани қаласында өтіп жатқан триатлоннан жасөспірімдер арасындағы Еуропа кубогы кезеңінде алтын медаль жеңіп алды.
Ұлттық олимпиадалық комитеттің мәліметінше, қазақстандық спортшы жарыс қашықтығын 35 минут 41 секундта еңсеріп, мәреге бірінші болып жетті.
Күміс медаль Румыния өкілі Тунде Кришанға (35:48) бұйырса, Италия спортшысы Элис Вентре (35:50) қола жүлдеге ие болды.
Жарыста Қазақстан құрамасының өзге спортшылары да сәтті өнер көрсетті. Алуа Нұрмұхамет бесінші орынға (36:03), Калерия Шнайдер алтыншы орынға (36:07), ал Аида Ким тоғызыншы орынға (36:13) тұрақтады.
Осылайша, Диана Ержанова Еуропа кубогы кезеңінде жеңіс тұғырының ең биік сатысына көтеріліп, Қазақстан құрамасына алтын медаль сыйлады.
