ADYM.KZ / Маңғыстау облысында халықаралық «Armour of God: Ultimatum» көркем фильмінің түсірілімі ресми түрде басталды. Әлемге әйгілі актер Джеки Чан қатысатын жоба Қазақстанның табиғи көрікті жерлерін халықаралық аудиторияға танытуға бағытталған.
Фильмнің түсірілімінің басталуына арналған салтанатты рәсімде режиссер Роберт Кун мен Джеки Чан кино әлеміндегі дәстүрге сай арнайы кинотарелканы сындырып, жаңа туындының өндірісіне ресми түрде старт берді.
Маңғыстау облысы әкімдігінің баспасөз қызметінің хабарлауынша, фильмнің негізгі көріністері өңірдің ең көрікті табиғи орындарының бірі – Бозжыра шатқалында түсіріледі. Халықаралық шығармашылық топ осы аймақта ауқымды түсірілім жұмыстарын жүргізіп, Қазақстанның бірегей табиғатын әлемдік көрерменге паш етуді көздеп отыр.
Бұл жоба Қазақстан киноиндустриясы үшін маңызды оқиға саналады. Жаңа фильм еліміздің халықаралық кинематографиядағы беделін арттырып, Қазақстанды шетелдік киножобаларды жүзеге асыруға қолайлы алаң ретінде танытуға ықпал етеді. Сонымен қатар, бастама отандық кино өндірісінің дамуына серпін беріп, халықаралық шығармашылық әріптестікті нығайтуға мүмкіндік жасайды.
