Манхэттеннің қақ ортасындағы әйгілі Таймс-сквер алаңында қазақстандық әнші Димаш Құдайбергенге арналған мерекелік LED-экрандар тағы да іске қосылды. Әлемге танымал отандық орындаушының құрметіне ұйымдастырылған бұл ерекше шараны америкалық жанкүйерлер қауымдастығы жүзеге асырды, деп хабарлайды Adym.kz тілшісі DimashNews басылымына сілтеме жасап.Жыл сайын дәстүрлі түрде өтетін бұл шара биыл да өзінің ауқымдылығымен ерекшеленді. Нью-Йорктің дәл жүрегінде бас қосқан америкалық «Dears» (әншінің жанкүйерлері) қауымдастығы қолайсыз әрі жаңбырлы ауа райына қарамастан, Димаштың 32 жасқа толуын жоғары деңгейде атап өтті. Жиналған қауым Таймс-сквердегі алып экрандардан жарқыраған әншінің бейнебаяндары мен құттықтау роликтерін тамашалап, бұл сәтті ерекше қуанышпен бөлісті.
Биылғы мерекелік іс-шара тек мәдени бағытпен шектеліп қалмай, қайырымдылық сипатқа ие болды. АҚШ-тағы жанкүйерлер бірлестігі (US Dears) Димаш Құдайберген ізгі ниет елшісі болып табылатын БҰҰ-ның Халықаралық көші-қон ұйымының (IOM) гуманитарлық бастамасына ресми түрде қосылды.
Естеріңізге сала кетейік, бұған дейін қазақстандық әртіс өзінің ізгілік миссиясы аясында Бангладешке барып, мәжбүрлі қоныс аударушылар лагеріндегі жандармен кездесіп, оларға материалдық әрі рухани қолдау көрсеткен болатын. Осы ретте әлемдік «Dears» қауымдастығы әншінің шығармашылығымен қатар, ол насихаттап жүрген мейірімділік, бірлік және өзара көмек идеяларын іс жүзінде қолдауды мақсат тұтып отыр.
Димаштың өнеріне деген халықаралық қызығушылық мұнымен толастамайды.
Мәселен, жуырда ғана Бельгияның ұлттық радиоэфирінде Димаш Құдайбергеннің шығармашылық жолы мен феноменалды вокалына арналған арнайы ауқымды радиобағдарлама жарыққа шыққан еді. Бұл еуропалық тыңдармандардың қазақ мәдениеті мен өнеріне деген жоғары бағасының тағы бір айқын дәлелі.
