Мемлекет басшысы Қасым-Жомарт Тоқаев елімізге ресми сапармен келген Черногория Президенті Яков Милатовичті Тәуелсіздік сарайында салтанатты түрде қарсы алды, деп хабарлайды Adym.kz ақпараттық сайты Ақордаға сілтеме жасап.
Ресми қарсы алу рәсімі барысында екі ел басшылары бір-біріне делегация мүшелерін таныстырды. Одан кейін құрмет қарауылының бастығы мемлекет басшыларына сәлемдік баянат жасап, Президент оркестрі Қазақстан мен Черногорияның мемлекеттік әнұрандарын орындады.
Әнұрандар шырқалған соң Қасым-Жомарт Тоқаев пен Яков Милатович Қазақстан Республикасының Мемлекеттік Туына қарай жүрді. Тудың алдына келген кезде Черногория Президенті құрмет белгісі ретінде басын иіп тағзым етті.
Салтанатты рәсімнен кейін мемлекет басшыларының қатысуымен шағын құрамдағы келіссөздер басталды.
Еске салсақ, Черногория Президенті Яков Милатович Қазақстанға 18-20 маусым аралығында Мемлекет басшысы Қасым-Жомарт Тоқаевтың шақыруымен ресми сапармен келді.
19 маусым күні өтетін жоғары деңгейдегі келіссөздер барысында тараптар саяси диалогты дамыту, сондай-ақ сауда-экономикалық, инвестициялық және мәдени-гуманитарлық ынтымақтастықтың келешегін талқылайды.
