ADYM.KZ / Президент Қасым-Жомарт Тоқаевтың бастамасымен жарияланған Халықаралық волонтерлер жылы аясында Нью-Йорктегі Біріккен Ұлттар Ұйымының штаб-пәтерінде волонтерлік саласындағы халықаралық ынтымақтастықты дамытуға арналған бірқатар іс-шара ұйымдастырылды.
Іс-шаралар Қазақстанның бастамасымен өтіп, оған Азиядағы өзара іс-қимыл және сенім шаралары жөніндегі кеңеске (АӨСШК) төрағалық етуші Әзербайжан, АӨСШК Хатшылығы және БҰҰ-ның Волонтерлер бағдарламасы (UNV) қолдау көрсетті.
Бағдарлама аясында «АӨСШК-ға мүше мемлекеттердегі волонтерлік» атты фотокөрме ашылып, «АӨСШК-ға мүше мемлекеттердегі волонтерліктің үздік тәжірибелері» тақырыбында халықаралық панельдік пікірталас өтті. Сонымен қатар АӨСШК елдеріндегі волонтерлік қозғалысты дамыту тәжірибесіне арналған электронды жинақтың тұсаукесері өтті.
Пікірталас барысында Қазақстанның волонтерлік қозғалысты дамытудағы тәжірибесі таныстырылды. БҰҰ өкілдері елімізде волонтерлер қызметін есепке алудың ұлттық жүйесін енгізу және волонтерлік мәдениетті дамытуға бағытталған мемлекеттік бастамаларды жоғары бағалады.
Іс-шараларға БҰҰ өкілдері, АӨСШК-ға мүше мемлекеттердің делегациялары және халықаралық сарапшылар қатысып, волонтерлікті дамыту, жастардың қоғамдық белсенділігін арттыру және халықаралық ынтымақтастықты нығайту бағытындағы тәжірибелерімен бөлісті.
БҰҰ штаб-пәтерінде өткен кездесулер Қазақстанның халықаралық деңгейде волонтерлік бастамаларды ілгерілетудегі белсенді рөлін тағы бір мәрте айқындады.
Еске сала кетейік, бұған дейін Дастан Сәтпаев пен ByDastann Халықаралық волонтерлер жылының жаһандық амбассадорлары болып жарияланған еді.
