ADYM.KZ / 2026 жылғы футболдан FIFA әлем чемпионаты аясында Мексиканың Халиско штатындағы Сапопан қаласында өткен FIFA Fan Fest фестивалінде Қазақстанның халық әртісі Димаш Құдайбергеннің шығармашылығы кеңінен насихатталды. Бұл туралы DimashNews хабарлады.
FIFA мен Халиско штаты үкіметі бірлесіп ұйымдастырған ресми жанкүйерлер алаңы әлем чемпионатының ең ірі мәдени-спорттық кеңістіктерінің бірі саналады. Фестиваль аясында матчтардың тікелей көрсетілімдерімен қатар музыкалық концерттер, фольклорлық бағдарламалар, гастрономиялық және интерактивті аймақтар, сондай-ақ Мексиканың мәдени дәстүрлерін таныстыратын түрлі іс-шаралар ұйымдастырылды.
Мәдени бағдарламаға қатысқан 13 жастағы мексикалық жас орындаушы Анхель Херардо Коваррубиас Кабрера (сахналық есімі – Angeloo) өз өнерін Димаш Құдайбергеннің шығармашылығына арнады. Оның айтуынша, ол қазақстандық әншінің өнерімен 10 жасында танысып, ерекше вокалдық шеберлігі мен шығармалары арқылы дәріптелетін рухани-адамгершілік құндылықтардан шабыт алған.
2025 жылы Angeloo Димаштың SOS әнін испан тілінде орындап, La Voz Zapopan de los Niños y las Niñas байқауының жеңімпазы атанған. Осы жетістігінің арқасында ол FIFA Fan Fest сахнасында өнер көрсету мүмкіндігіне ие болды.
Екі мыңнан астам көрермен жиналған концертте жас орындаушы Димаштың Diva Dance, Sinful Passion және When I’ve Got You композицияларын орындады. Оның өнеріне Dears Jalisco Mexico фан-клубының мүшелері қолдау көрсетті.
«Димаштың өнері арқылы жеткізілетін ізгі идеяларды көпшілікке насихаттау мен үшін үлкен қуаныш. Оның шығармашылығымен мүмкіндігінше көп адамның танысқанын қалаймын. Бір күні өзімен кездесіп, өміріме шабыт сыйлағаны үшін алғыс айту – менің ең үлкен арманым», – деді жас әнші.
