ADYM.KZ / 2026 жылдың алғашқы алты айында Қазақстандағы мемлекеттік музей-қорықтарға 784 122 адам келді. Осы кезеңде келушілер үшін 7 638 экскурсия ұйымдастырылып, 198 көрме өткізілді. Сонымен қатар ғылыми-зерттеу, реставрация және мәдени-ағартушылық бағыттағы бірқатар жоба жүзеге асырылды.
Мәдениет және ақпарат министрлігінің мәліметінше, музей-қорықтар мәдени туризмді дамытудағы маңызды орталықтардың бірі саналады. Олардың құрамына археологиялық ескерткіштер, тарихи орындар, мемориалдық кешендер және ашық аспан астындағы бірегей мәдени мұра нысандары кіреді.
Еліміздегі танымал музей-қорықтардың қатарында Ұлытаудағы Жошы хан мен Алаша хан кесенелері, Теректі әулие мен Әулиетау тарихи орындары, Түркістандағы «Әзірет Сұлтан» музей-қорығы және Қожа Ахмет Ясауи кесенесі, сондай-ақ көне петроглифтерімен белгілі Таңбалы музей-қорығы бар.
Экскурсиялық қызметпен қатар тарихи-мәдени мұраны сақтау бағытындағы жұмыстар да жүйелі жалғасып келеді. Алғашқы жартыжылдықта тарихи ескерткіштерде ғылыми зерттеулер жүргізіліп, реставрациялау және консервациялау жұмыстары атқарылды. Атап айтқанда, Қожа Ахмет Ясауи кесенесінде желдету шахталары тексеріліп, ескерткіш құрылымдарының беріктігін сақтауға бағытталған ғылыми зерттеулер жүзеге асырылды. Ал Сарайшық қалашығында ғылыми-реставрациялық жұмыстар жүргізіліп, тарихи жерлеу орындары қалпына келтірілді.
Есепті кезеңде музей-қорықтар базасында 4 ғылыми конференция ұйымдастырылып, 4 ғылыми жоба іске асырылды. Сонымен қатар «Есік» және «Берел» музей-қорықтарының мамандары архив қорларын зерттеу мақсатында Түркия, Польша және Қытайда тағылымдамадан өтіп, халықаралық ғылыми экспедицияларға қатысты.
Жүргізілген ғылыми жұмыстардың нәтижесінде 9 ғылыми мақала жарық көрді. Оның ішінде халықаралық ғылыми базалар мен салалық басылымдарда жарияланған зерттеулер де бар. Сондай-ақ отандық және шетелдік серіктестермен 25 ынтымақтастық туралы меморандумға қол қойылды.
Музей-қорықтардың өкілдері Анкара, Сиань, Якутск және Астана қалаларында өткен халықаралық форумдарға қатысып, тарихи-мәдени мұраны сақтау және насихаттау бағытындағы тәжірибелерімен бөлісті. Бұдан бөлек, саладағы еңбегі үшін 10 қызметкер мемлекеттік наградамен марапатталды.
