ADYM.KZ / Шымкент қаласында жастардың діни сауаттылығын арттыру, интернет кеңістігіндегі ақпаратты дұрыс бағалау және түрлі теріс діни ағымдардың ықпалынан сақтандыру мақсатында кездесу өтті.
Шымкент қаласы Жастар саясаты басқармасының «Жастар ресурстық орталығы» КММ ұйымдастырған «Ғаламтор – діни ұстаз емес» тақырыбындағы іс-шара М. Әуезов атындағы Оңтүстік Қазақстан университетінің колледжінде білім алатын жастардың қатысуымен өтті.
Кездесуге Этносаралық қатынастарды талдау және ақпараттық қамтамасыз ету бөлімінің сарапшысы Маржан Әлібайқызы Бесбаева, Шымкент қаласы Дін істері басқармасы Дін мәселелерін зерттеу орталығы КММ-нің теолог маманы Рауан Мұхитұлы Қыпшақбаев және Жастар ресурстық орталығының маманы Жасұлан Шоханұлы Аязбек қатысты.
Жиында жастар арасындағы ұлтаралық татулық пен қоғамдық келісімді сақтау, діни танымды қалыптастыруда әлеуметтік желілердің ықпалы, сондай-ақ интернет арқылы таралатын күмәнді діни ақпараттар мен жат ағымдардың қаупі талқыланды.
Мамандар жастарға діни мәселелер бойынша ақпаратты кез келген интернет ресурсынан қабылдай бермеу керектігін түсіндірді. Әсіресе әлеуметтік желілерде жарияланатын бейнероликтер мен жазбалардың мазмұнына сын көзбен қарап, олардың дереккөзі мен авторына назар аудару маңызды екені айтылды. Діни сұрақтар туындаған жағдайда білікті теолог мамандардан және ресми діни мекемелерден кеңес алудың қажеттігі атап өтілді.
Сонымен қатар кездесуде өзге діни ағымдардың ықпалына түсудің алдын алу, жастардың сыни ойлау қабілетін дамыту және қоғамдағы өзара құрмет пен түсіністікті нығайту мәселелеріне басымдық берілді. Қатысушыларға тақырыпты тереңірек түсіндіру мақсатында арнайы бейнеролик көрсетілді.
Іс-шара барысында жастар өздерін толғандырған сұрақтарын қойып, мамандардан жауап алды. Кері байланыс форматында өткен әңгіме қатысушыларға діни ақпаратты дұрыс ажыратып, интернеттегі мәліметтерге жауапкершілікпен қараудың маңызын түсінуге мүмкіндік берді.
Мұндай кездесулер жастардың діни сауатын арттыруға, ақпараттық қауіпсіздік мәдениетін қалыптастыруға және қоғамдағы татулық пен тұрақтылықты сақтауға бағытталған.
