ADYM.KZ / Қазақстан Республикасы Орталық сайлау комиссиясының (ОСК) отырысында Жалпыұлттық социал-демократиялық партияның Құрылтай сайлауына ұсынған партиялық тізімі ресми тіркелді. Тізімге барлығы 33 кандидат енгізілген.
ОСК төрағасы Нұрлан Әбдіровтің айтуынша, шешім «Қазақстан Республикасындағы сайлау туралы» Конституциялық заңның 89-бабына сәйкес қабылданды.
Қаулыға сәйкес, Жалпыұлттық социал-демократиялық партияның партиялық тізімі ресми тіркеліп, аталған тізім бойынша Құрылтай депутаттығына кандидаттарға тиісті куәліктер беріледі.
Сонымен қатар ОСК аппараты партиялық тізімнің тіркелгені туралы мәліметтерді арнайы уақытша сайлау қорын ашу үшін «Қазақстан Халық банкі» АҚ-на жолдайды.
Сондай-ақ партиялық тізімнің тіркелгені туралы хабар бұқаралық ақпарат құралдарында және Орталық сайлау комиссиясының ресми интернет-ресурсында жарияланады. Бұдан бөлек, Жалпыұлттық социал-демократиялық партияның атауы Құрылтай сайлауына арналған сайлау бюллетеніне енгізіледі.
