ADYM.KZ / 2025 жылы республикалық бюджетке 730 млрд теңге көлемінде салық толық түспеген. Бұл туралы салықтық және кедендік әкімшілендірудің тиімділігіне жүргізілген мемлекеттік аудит қорытындысында Жоғары аудиторлық палата мәлімдеді.
Аудит нәтижесіне сәйкес, есепті кезеңде республикалық бюджетке түсуі тиіс салықтық түсімдер жоспары 4,8 пайызға орындалмаған. Мемлекеттік аудиторлардың айтуынша, бұған негізгі себептердің бірі – салық түсімдерінің 1,3 трлн теңгеге артық жоспарлануы.
– Есепті кезеңде республикалық бюджетке түсетін салықтық түсімдер жоспары толық орындалмады. Түспеген қаражат көлемі 730 млрд теңгені немесе жоспардың 4,8 пайызын құрады. Бұған салық түсімдерінің шамадан тыс жоспарлануы әсер етті, – делінген Жоғары аудиторлық палатаның хабарламасында.
Аудит барысында соңғы төрт жылда қосымша есептелген салықтарға қатысты сот дауларының жартысынан астамы салық төлеушілердің пайдасына шешілгені анықталды. Бұған салық заңнамасының талаптарын сақтамау және тексеру актілерін рәсімдеу кезінде жіберілген қателіктер себеп болған.
Кедендік әкімшілендіру саласында да бірқатар заңбұзушылықтар тіркелді. Атап айтқанда, электр көліктеріне арналған жеңілдіктердің гибридті автокөліктерді импорттау кезінде де қолданылуы салдарынан бюджетке кемінде 70 млн теңге түспеген.
Сонымен қатар сыртқы экономикалық қызметтің 34 қатысушысы импорт кезінде қосылған құн салығын есепке жатқызу әдісін заңсыз пайдаланған. Соның нәтижесінде бюджетке импорттық ҚҚС бойынша 670 млн теңгеден астам қаражат түспей қалған.
Жоғары аудиторлық палатаның мәліметінше, аудит қорытындысы бойынша 2,7 млрд теңге көлемінде қаржылық бұзушылық анықталған. Сондай-ақ 33 рәсімдік бұзушылық пен 11 жүйелі кемшілік тіркелген.
Бұдан бөлек, аудит аяқ киім өнімдерін міндетті таңбалау жүйесінің мүмкіндігі толық пайдаланылмай отырғанын көрсетті. Осыған байланысты Мемлекеттік кірістер комитетіне мемлекеттік қызметтердің сапасын бақылау және мониторинг жүргізу тетіктерін жетілдіру ұсынылды.
