ADYM.KZ / Қазақстандық жоғары оқу орындарының студенттері әзірлеген жасанды интеллектке (ЖИ) негізделген инновациялық жобалар білім беру, өнеркәсіп, денсаулық сақтау және мемлекеттік басқару салаларына кезең-кезеңімен енгізіліп жатыр. Бұл туралы Ғылым және жоғары білім министрлігі хабарлады.
Министрліктің мәліметінше, AI-Sana бағдарламасының негізгі нәтижелерінің бірі – студенттер мен университеттік командалардың оқу жобаларын нақты секторда қолданылатын технологиялық өнімдерге айналдыруы. Қазір бірқатар жоба пилоттық кезеңнен өтіп, халықаралық серіктестер мен инвесторлардың қызығушылығын тудырған.
– AI-Sana бағдарламасына қатысушылар жасанды интеллект технологияларын меңгерумен қатар, түрлі салаларға арналған инновациялық шешімдер әзірлеуде. Бірқатар жоба пилоттық енгізу кезеңінен сәтті өтіп, халықаралық серіктестердің қолдауына және инвесторлардың қызығушылығына ие болды, – делінген министрлік хабарламасында.
Бағдарлама аясында Astana IT University күн панельдеріндегі ақауларды дрондардың көмегімен анықтайтын EnergyDronesAI жүйесін әзірледі. Жоба Shell компаниясының халықаралық грантын жеңіп алып, Қытайдағы халықаралық байқауда алтын медаль иеленді.
Ал Шығыс Қазақстан техникалық университеті шахталардағы қозғалысты бақылап, өндірістік қауіпсіздікті арттыруға арналған Smart Safety Monitor жүйесін жасап шығарды. Бұл жоба Дүниежүзілік банктің гранттық қолдауына ие болған.
Ерекше қажеттіліктері бар азаматтарға арналған технологиялар да бағдарлама аясындағы маңызды бағыттардың бірі саналады. Л.Н. Гумилев атындағы Еуразия ұлттық университеті қазақ тіліндегі медиаконтентті автоматты түрде ымдау тіліне аударатын SignBridge AI жүйесін әзірледі. Қазіргі уақытта бұл технология «Jibek Joly» телеарнасының бағдарламаларында қолданылып келеді.
Сонымен қатар Қорқыт ата атындағы Қызылорда университеті SeoulTech филиалымен бірлесіп фишингтік шабуылдар мен цифрлық қауіптерден қорғауға арналған PhishGuard AI платформасын әзірлеуде. Қазір аталған жүйені прокуратура органдарының жұмысына енгізу мәселесі қарастырылып жатыр.
Ал Әл-Фараби атындағы Қазақ ұлттық университеті Astana Hub-пен бірлесіп стартаптарды онлайн-инкубациялауға арналған AI Startify Incubator платформасын дамытуда.
Министрліктің мәліметінше, AI-Sana бағдарламасы қазақстандық студенттердің ғылыми әзірлемелерін нақты өндіріске енгізуге және жасанды интеллект технологияларын ел экономикасының түрлі саласында кеңінен қолдануға мүмкіндік беріп отыр.
