АСТАНА. ADYM.KZ / AMANAT партиясының XXVI съезінде партияның алдағы даму бағыты талқыланып, AMANAT пен «Әділет» партияларын біріктіру бастамасы жарияланды. Съезге қатысушылар бұл қадамды қолдап, оның елдің стратегиялық мақсаттарын жүзеге асыруға ықпал ететінін атап өтті.
Съезд барысында Саяси кеңес пен Орталық бақылау-тексеру комиссиясының қызмет қорытындылары қаралып, партия жұмысының алдағы басым бағыттары айқындалды.
Павлодар облыстық мәслихатының төрағасы Илья Теренченко жаңа Конституция Қазақстанның одан әрі дамуына берік құқықтық негіз қалыптастырғанын айтты. Оның пікірінше, реформалардың нәтижелі болуы оларды өңірлерде жүйелі әрі дәйекті іске асыруға байланысты. Сондай-ақ мемлекеттік институттар, саяси партиялар мен азаматтық қоғам күш-жігерін ортақ мақсаттарға жұмылдырудың маңызы зор екенін жеткізді.
Парламент Мәжілісіндегі партия фракциясының мүшесі Нұрсұлтан Байтілесов жүргізіліп жатқан реформалар жастарға жаңа мүмкіндіктер ашқанын атап өтті. Оның айтуынша, жастар бүгінде қоғамдық бастамалармен қатар заң шығару үдерісіне де белсенді қатысып келеді. Депутат жастарды елдегі саяси жаңғырудың негізгі қозғаушы күштерінің бірі ретінде бағалады.
Шығыс Қазақстан облыстық көпсалалы медициналық орталығының директоры әрі бастауыш партия ұйымының төрайымы Гүлмира Сағидуллина әлеуметтік және қайырымдылық жобаларды жүзеге асыру, отбасыларды, жастарды, ардагерлер мен ерекше қажеттілігі бар азаматтарды қолдау бағытындағы жұмыстар туралы баяндады.
Съезге қатысушылар реформаларды жалғастырудың, қоғамдық келісімді нығайтудың және мемлекет пен азаматтардың мүддесі жолында күш біріктірудің маңызын атап өтті. Сонымен қатар AMANAT партиясының «Әділет» партиясымен бірігуі жинақталған тәжірибені, кадрлық және қоғамдық әлеуетті тиімді пайдаланып, Әділетті әрі Прогрессивті Қазақстан құруға қосымша мүмкіндік беретіні айтылды.
