ADYM.KZ / Индонезияның Джакарта қаласында өтіп жатқан бокстан Азия чемпионатында финалдық жекпе-жектер жалғасуда. Қазақстан құрамасының өкілі Айдана Убайдуллақызы құрлық біріншілігінің жеңімпазы атанды.
U19 жас санатындағы 80 келіге дейінгі салмақ дәрежесінде өнер көрсеткен Айдана финалда Үндістан боксшысы Мега Шеокандпен кездесіп, төрешілердің шешімімен жеңіске жетті. Осылайша ол Азия чемпионатының алтын медалін иеленді.
Қазақстан құрамасының қоржынына тағы екі алтын жүлде түсті. U19 санатындағы Камила Оспанова финалда Өзбекстанның әлем чемпионы Мафтуна Янгиевамен қолғап түйістіріп, тартысты өткен кездесуде 3:2 есебімен басым түсіп, Азия чемпионы атанды.
Ал +80 келі салмақ дәрежесінде сынға түскен Зарина Толыбай финалда Үндістан өкілі Пречи Токаспен кездесіп, төрешілердің бірауыз шешімімен (5:0) жеңіске жетті.
Осылайша қазақстандық боксшылар Джакартадағы Азия чемпионатында тағы үш алтын медаль жеңіп алып, ел қоржынын кезекті жоғары жетістіктермен толықтырды.
