ADYM.KZ / Шымкент қаласындағы «Астана» алаңында ұлттық мереке – Республика күніне арналған мерекелік концерт екінші күні де жалғасын тапты. Көтеріңкі көңіл күйге толы мәдени іс-шараға қала тұрғындары мен қонақтары жиналып, отандық эстрада жұлдыздары мен жергілікті өнерпаздардың өнерін тамашалады.
Мерекелік концерт барысында танымал әншілер сахна төрінде өнер көрсетіп, көрермендерге әсем әндерін тарту етті. Атап айтқанда, Жұбаныш Жексенұлы, Нұржан Керменбаев, Мәдина Сәдуақасова, Дастан Оразбеков және басқа да өнерпаздар көпшілікке көтеріңкі көңіл күй сыйлады. Әуезді әндер мен жарқын музыкалық қойылымдар мерекелік кештің сәнін келтіріп, алаңға жиналған жұртшылықтың ыстық ықыласына бөленді.
Шымкент қаласының әкімдігі ұйымдастырған ауқымды мәдени іс-шараның басты мақсаты – ұлттық құндылықтарды дәріптеу, ел бірлігі мен тәуелсіздіктің қадірін ұғындыру, сондай-ақ ұлттық мерекенің тарихи маңызын кеңінен насихаттау. Мұндай мәдени бастамалар тұрғындардың ортақ құндылықтар төңірегінде топтасуына, жас ұрпақтың ел тарихына деген құрметін арттыруға ықпал етеді.
Республика күні – мемлекеттілігіміздің қалыптасу жолын саралап, егемендіктің мәнін терең түсінуге және ел болашағына жауапкершілікпен қарауға үндейтін маңызды мереке. Бұл күн халықтың бірлігі мен ынтымағын нығайтып, жаңару мен жасампаздыққа деген ұмтылысын арттыра түседі.
Биыл айтулы мереке Қазақстанның жаңа тарихи белесі – Тәуелсіздіктің 35 жылдығымен тұспа-тұс келіп отыр. Осыған орай Шымкентте ұйымдастырылған мерекелік іс-шаралар қала тұрғындарына ерекше көңіл күй сыйлап, ұлттық мерекенің мазмұнын байыта түсті.
Осылайша, екі күнге жалғасқан концерттік бағдарлама мерекелік отшашумен қорытындыланды. Жарқыраған отшашу «Астана» алаңына жиналған жұртшылыққа ерекше әсер сыйлап, Республика күніне арналған мерекелік кештің жарқын нүктесіне айналды.
