ADYM.KZ / Мемлекет басшысы Қасым-Жомарт Тоқаев Contemporary Amperex Technology Co. Ltd. (CATL) директорлар кеңесінің теңтөрағасы Пань Цзяньмен кездесті. Бұл туралы Ақорданың баспасөз қызметі хабарлады.
Кездесу барысында тараптар жоғары технологиялар саласындағы ұзақмерзімді ынтымақтастықтың келешегі мен бірлескен инвестициялық жобаларды іске асыру мәселелерін талқылады.
Президент CATL компаниясының Қазақстанда аккумулятор батареяларын шығаратын зауыт салу туралы бастамасын қолдап, мұндай кәсіпорынның Орталық Азиядағы осы бағыттағы алғашқы ірі өндіріс орнына айналуы мүмкін екенін атап өтті.
Қасым-Жомарт Тоқаев Қазақстанның шикізатты өңдеуден бастап дайын өнім шығаруға дейінгі толық өндірістік циклді қалыптастыруға қажетті әлеуеті бар екенін айтты.
Өз кезегінде Пань Цзянь CATL Қазақстанды компанияның негізгі бағыттары бойынша бірлескен жобаларды жүзеге асыруға қолайлы әрі сенімді серіктес ретінде қарастыратынын жеткізді. Сондай-ақ компания Қазақстанның 2060 жылға қарай көміртегі бейтараптығына қол жеткізу жөніндегі стратегиялық мақсатына үлес қосуға дайын екенін мәлімдеді.
CATL – 2011 жылы құрылған және электромобильдерге арналған аккумуляторлар өндірісі бойынша әлемдік көшбасшылардың бірі. Компания жаһандық нарықтың шамамен 40 пайызын иеленеді. 2025 жылдың қорытындысы бойынша CATL аккумулятор өнімдерін сату көлемін 661 ГВт/сағатқа жеткізіп, 62,6 млрд доллар табыс тапқан. Оның ішінде таза пайда көлемі 10,6 млрд долларды құрады.
