ADYM.KZ / Қазақстан Ұлттық банкінің мамандары банкноталар айналымға жіберілмес бұрын олардың күнделікті қолданыста кездесетін түрлі әсерлерге төзімділігін арнайы сынақтар арқылы тексеретінін мәлімдеді.
Ұлттық банк өкілдерінің айтуынша, сынақ барысында банкнота қағазы мен қорғаныш элементтерінің ластануға, ылғалға, температураның өзгеруіне және механикалық әсерлерге төзімділігі жан-жақты бағаланады.
– Мамандар банкноталарды күнделікті өмірде кездесуі мүмкін түрлі жағдайларға сынайды. Мәселен, олар суға және жуғыш заттарға салынып, әртүрлі температура жағдайында тексеріледі. Осылайша банкноталардың кір жуғыш машинада жуылғаннан кейінгі күйі мен беріктігі бағаланады, – деп хабарлады Ұлттық банк.
Сынақтың алғашқы кезеңінде мамандар күнделікті қолданыс барысында банкноталарға жұғуы мүмкін кір мен дақтардың қасиетін қайталайтын арнайы қоспа дайындайды. Одан кейін банкнота қағазының бастапқы сипаттамалары зерттеліп, ол айналым кезіндегі әсерлерді модельдейтін арнайы құрылғыға орналастырылады.
Сынақ аяқталған соң банкноталардың қағазы қайта тексеріліп, қорғаныш элементтерінің сақталуы, қағаз сапасы, беріктігі, икемділігі және ұзақ уақыт пайдалануға төзімділігі бағаланады.
Ұлттық банктің мәліметінше, мұндай зерттеулердің нәтижесінде заманауи технологиялар енгізіліп, ұзақ уақыт бойы сапасы мен қорғаныш қасиеттерін сақтайтын, сенімділігі жоғары банкноталар әзірленеді.
