ADYM.KZ / 2026 жылдың бірінші жарты жылдығында Қазақстандағы өңдеу өнеркәсібінің өндіріс көлемі 9,8 пайызға артты. Бұл туралы Үкімет отырысында Өнеркәсіп және құрылыс министрі Ерсайын Нағаспаев мәлімдеді.
Министрдің айтуынша, өсім машина жасау, химия өнеркәсібі, құрылыс материалдары, резеңке және пластмасса бұйымдары, жеңіл өнеркәсіп және басқа да салалардағы өндіріс көлемінің ұлғаюы есебінен қамтамасыз етілген.
Ең жоғары көрсеткіштердің бірі машина жасау саласында тіркелді. Бұл бағыттағы өндіріс көлемі 23,1 пайызға өскен. Атап айтқанда, көлік құралдары, ауыл шаруашылығы және теміржол техникасы, сондай-ақ тұрмыстық техника өндірісі артқан.
Жеңіл өнеркәсіпте де айтарлықтай өсім байқалды. Бұл саладағы өндіріс көлемі 94,8 пайызға ұлғайып, тоқыма бұйымдары, киім және былғары өнімдерін шығару қарқыны артқан.
Сонымен қатар химия өнеркәсібінде өндіріс 20,7 пайызға өсті. Бұл салада күкірт қышқылы, аммофос, каустикалық сода, аммиак селитрасы және сары фосфор өндірісі көбейген.
Құрылыс материалдарын өндіру көлемі 14,1 пайызға артты.
Ерсайын Нағаспаев құрылыс саласындағы жұмыстардың да оң динамика көрсеткенін атап өтті. Биылғы бірінші жарты жылдық қорытындысы бойынша құрылыс жұмыстарының көлемі шамамен 4,1 трлн теңгені құрап, өткен жылдың сәйкес кезеңімен салыстырғанда 15,2 пайызға өскен.
