ADYM.KZ / Соңғы 20 жылда Каспий теңізінің деңгейі 2 метрден астамға төмендеді. Маңғыстау облысының жағалау сызығы кей жерлерде жүздеген метрге шегінген. Каспийге құятын негізгі күретамыр Жайық (Урал) өзенінің сулылығы соңғы жылдары 30-40 пайызға азайған.
Бұған Ресей аумағында салынған ондаған ірі су қоймалары себеп. Ақтау портындағы су деңгейінің төмендеуі Транскаспий халықаралық көлік маршрутының (Орта дәліз) әлеуетіне соққы болуда, өйткені үлкен жүк кемелерінің айлаққа жақындауы қиындаған. Сондай-ақ, «Қашаған» секілді ірі мұнай кен орындарындағы теңіз инфрақұрылымына да қауіп төніп тұр. Экологиялық тұрғыдан Каспий итбалығының жаппай қырылуы жиіледі.
Экологтардың пікірінше, Каспийдің мәселесі бес мемлекеттің (Қазақстан, Ресей, Әзірбайжан, Түрікменстан, Иран) ортақ қасіреті. Бірақ ең үлкен соққы Теңіздің солтүстік, таяз бөлігі орналасқан Қазақстанға тиіп отыр. Ресеймен Жайық өзенінің эко-жүйесін құтқару бойынша мемлекетаралық комиссия жұмысын күшейтпесе, Ақтау мен Атырау өңірі үлкен әлеуметтік-экологиялық дағдарысқа тап болады.
