ADYM.KZ / Құрылтай депутаттарының сайлауын өткізуге 34,3 млрд теңге қарастырылды. Бұл туралы Орталық сайлау комиссиясының мүшесі Михаил Бортник мәлімдеді.
Оның айтуынша, былтыр республикалық бюджет бекітілген кезде Құрылтай депутаттарының сайлауын өткізу жоспарда болмаған. Осыған байланысты қажетті қаражат Үкімет резервінен бөлінген.
— Сайлау бюджеті аумақтық сайлау комиссияларының өтінімдері негізінде және сайлау туралы заңнама талаптарына сәйкес жасалды. Онда сайлау процесін толық ұйымдастыруға қажетті барлық шығындар қамтылған, — деді Михаил Бортник.
ОСК өкілінің мәліметінше, бөлінген қаржының 8,5 млрд теңгесі еліміз бойынша жұмыс істейтін 70 мыңнан астам сайлау комиссиясы мүшесінің еңбекақысына бағытталады.
Биыл республика аумағында 10 674 сайлау учаскесі жұмыс істейді. Сондай-ақ бөлінген қаражат есебінен 47 жаңа сайлау учаскесін ашу жоспарланған.
Қаржы сайлау бюллетеньдерін, плакаттарды, ақпараттық стендтерді және әдістемелік материалдарды әзірлеуге, сондай-ақ сайлау комиссияларын байланыс, көлік және қажетті материалдық-техникалық құралдармен қамтамасыз етуге жұмсалады.
