ADYM.KZ / Air Astana әуе компаниясы Таяу Шығыстағы ахуалдың шиеленісуіне байланысты Дубай бағыты бойынша 13–14 шілдеге жоспарланған бірнеше рейсті тоқтатты.
Компанияның мәліметінше, 13 және 14 шілдеге жоспарланған KC897/898 Алматы – Дубай – Алматы рейстері, сондай-ақ 14 шілдеге белгіленген KC205/206 Астана – Дубай – Астана рейстері күшін жойды.
Әуе тасымалдаушысы жолаушыларға билет құнын толық қайтаруды немесе 12–18 шілде аралығына жоспарланған сапарларды 31 шілдені қоса алғанға дейінгі рейстерге қосымша ақысыз қайта брондауды ұсынатынын хабарлады.
«Рейстер кестесіндегі алдағы өзгерістер туралы кейінірек хабарланады. Air Astana жағдайды жіті бақылап, жолаушыларды тасымалдауға қатысты мәселелерді шешу жұмыстарын жүргізіп жатыр», – делінген компанияның хабарламасында.
Жолаушылар қосымша ақпаратты Air Astana-ның брондау және ақпарат орталығы арқылы немесе компанияның ресми байланыс арналары арқылы ала алады.
