ADYM.KZ / Президент Қасым-Жомарт Тоқаев Райымбек ауданының құрылғанына 90 жыл толуына орай өңір тұрғындарына құттықтау жолдады. Мемлекет басшысының хатын ҚР Президентінің кеңесшісі Мәлік Отарбаев «Хан-Тәңірі қазынасы» халықаралық этнофестивалінің салтанатты ашылу рәсімінде оқып берді.
Құттықтауында Президент Райымбек ауданын тарихы терең, бірлік дәстүрі берік қасиетті мекен ретінде атап өтіп, бұл өңірден ел мүддесіне адал қызмет еткен көптеген көрнекті тұлғалар шыққанын айтты.
Мемлекет басшысы Бердібек Соқпақбаев пен Мұқағали Мақатаевтың шығармашылық мұрасы ұлттың рухани қазынасына айналып, жас ұрпақты отансүйгіштікке, білімге құштарлыққа және еңбекқорлыққа тәрбиелеп келе жатқанын ерекше атап өтті.
Сондай-ақ Президент бүгінде аудан тұрғындарының ауыл шаруашылығы, туризм және экономиканың басқа да салаларын дамытуға елеулі үлес қосып жүргеніне тоқталды. Оның айтуынша, жергілікті халық ел болашағына бағытталған маңызды бастамаларды қолдап, азаматтық жауапкершілік пен қоғамдық бірліктің үлгісін көрсетіп келеді.
Қасым-Жомарт Тоқаев ауданның өсіп-өркендеуіне үлес қосып жүрген барлық азаматқа алғыс айтып, тұрғындарға зор денсаулық, бақ-береке, толайым табыс және ел игілігі жолындағы еңбектеріне жаңа жетістіктер тіледі.
Айта кетейік, Райымбек ауданының 90 жылдығына арналған мерейтойлық шаралар үш күнге созылды. Бағдарлама аясында ғылыми-танымдық конференциялар, республикалық ақындар айтысы, спорттық жарыстар мен концерттер ұйымдастырылды. Мерейтойдың негізгі іс-шарасы Шалкөде жайлауында өткен «Хан-Тәңірі қазынасы» халықаралық этнофестивалі болды.
