ADYM.KZ / Шымкент қаласы Жастар саясаты басқармасына қарасты «Жастар ресурстық орталығы» КММ-нің ұйымдастыруымен «Кәсіби бағдар беру және еңбек нарығына бейімдеу» жобасы аясындағы танымдық кездесулер жалғасуда. Жобаның негізгі мақсаты – жоғары сынып оқушыларына мамандық таңдауда бағыт-бағдар беру, еңбек нарығының ерекшеліктерін түсіндіру және болашаққа саналы жоспар құруына көмектесу.
Осы бағытта қаладағы №116, №16, №102 және №27 жалпы білім беретін мектептердің жоғары сынып оқушыларымен кездесулер ұйымдастырылды. Іс-шараларға спикер Ақан Бесбаев қатысып, оқушыларға кәсіби даму мен мамандық таңдауға қатысты маңызды ақпараттар ұсынды.
Кездесу барысында заманауи еңбек нарығының талаптары, қазіргі таңда сұранысқа ие мамандықтар және түрлі салаларда жұмыс істеу мүмкіндіктері туралы айтылды. Спикер болашақ мамандықты таңдағанда тек оның танымалдығына немесе табыс деңгейіне ғана емес, адамның жеке қабілетіне, қызығушылығына және алға қойған мақсатына да мән беру қажеттігін атап өтті.
Сонымен қатар оқушыларға өз мүмкіндіктерін ерте бастан бағамдап, жеке мақсаттарын айқындау, қажетті білім мен дағдыларды жүйелі түрде меңгеру жөнінде кеңестер берілді. Қазіргі еңбек нарығы үнемі өзгеріп отыратындықтан, жаңа технологияларды игеру, өз білімін жетілдіру және өзгерістерге бейімделу маңызды екені түсіндірілді. Кәсіби жетістікке жету үшін теориялық біліммен қатар, тәжірибелік дағдыларды дамыту мен жауапкершілікті қалыптастырудың да маңызы зор.
Кездесулер интерактивті форматта өтіп, оқушылар өздерін қызықтырған сұрақтарын қойды. Олар мамандық таңдауға, болашақта білім алатын бағытты анықтауға және еңбек нарығындағы мүмкіндіктерге қатысты пайдалы мәліметтер алды. Мұндай ашық пікір алмасу жасөспірімдердің өз болашағына байыппен қарап, шешім қабылдауына ықпал етеді.
Кәсіби бағдар беру жұмыстары жастардың әлеуетін ашуға, қабілеттеріне сай бағыт таңдауына және болашақ еңбек жолына дайындалуына мүмкіндік береді. «Жастар ресурстық орталығы» жүзеге асырып жатқан жоба аясындағы кездесулер алдағы уақытта да жалғасып, оқушылардың кәсіби сауаттылығын арттыруға бағытталады.
