ADYM.KZ / Мемлекет басшысы Қасым-Жомарт Тоқаев Қатар Әмірі шейх Тәмим бен Хамад Әл Тәниге көңіл айту жеделхатын жолдады. Бұл туралы Ақорданың баспасөз қызметі хабарлады.
Президент жеделхатында Қатар Мемлекетінің бұрынғы Әмірі, «Әмір әке» атағын иеленген шейх Хамад бен Халифа Әл Танидің дүниеден озғаны туралы хабарды терең күйзеліспен қабылдағанын жеткізді.
Қасым-Жомарт Тоқаев Қатар Әміріне, оның әулетіне және барша Қатар халқына көңіл айтып, марқұмның елдің дамуына және халықаралық ынтымақтастыққа қосқан үлесін атап өтті.
«Шейх Хамад бен Халифа Әл Тәни – Қатардың өсіп-өркендеуіне және халқының баянды болашағын қамтамасыз етуге тарихи үлес қосқан, халықаралық бейбітшілік пен тұрақтылықты нығайтуға риясыз қызмет еткен біртуар қайраткер. Қазақстандықтар оны парасатты басшы, халықаралық деңгейдегі беделді саясаткер әрі екіжақты ынтымақтастықты дамытуға зор еңбек сіңірген тарихи тұлға ретінде әрдайым есте сақтайды», – делінген жеделхатта.
Еске сала кетейік, Қатардың бұрынғы әмірі, ресми түрде «Әмір әке» атағына ие болған шейх Хамад бен Халифа Әл Тәни 74 жасында өмірден өтті. Осыған байланысты Қатарда төрт күндік жалпыұлттық аза тұту жарияланды.
