ADYM.KZ / Қазақстандық теннисшілер Асылжан Арыстанбекова мен Іңкәр Дүйсебай Астанада өтіп жатқан ITF W15 халықаралық турнирінің жұптық сынында финалға жолдама алды.
Турнирдің бірінші ракеткасы ретінде тіркелген қазақстандық жұп жарыс барысында өткізген үш кездесуінде де жеңіске жетті.
Жартылай финалда Асылжан Арыстанбекова мен Іңкәр Дүйсебай ресейлік Валерия Луценко мен Дарья Харланованы 7:6 (7:4), 6:0 есебімен жеңді.
Енді қазақстандық теннисшілер чемпиондық атақ үшін ресейлік Мария Шолохова мен Оңтүстік Корея өкілі Гаыль Чжанға қарсы кортқа шығады.
Сонымен қатар қазақстандық Аружан Сағындықова жекелей сында жартылай финалға шықты. Әлемдік рейтингте 664-орында тұрған, турнирдің алтыншы ракеткасы саналатын теннисші ширек финалда отандасы Іңкәр Дүйсебайды 6:3, 6:3 есебімен жеңді.
Аружан Сағындықова финал жолдамасын Таиланд өкілі Камонван Йодпетчпен сарапқа салады.
