ADYM.KZ / Индонезияның Ұлттық зерттеу және инновация агенттігі (BRIN) никель кенін өңдеудің жаңа технологиясын әзірледі. Жаңа әдіс өндіріс қалдықтарындағы құнды компоненттердің 98 пайызға дейінін қайта қалпына келтіруге мүмкіндік береді.
БРИКС TV-дің Вьетнам жаңалықтар агенттігіне (VNA) сілтеме жасап хабарлауынша, технологияның басты ерекшелігі – никель кенінің екі негізгі түрі – сапролит пен лимонитті бір технологиялық процесте қатар өңдей алуы. Бұған дейін бұл кен түрлері жеке-жеке өңделіп келген.
Жаңа әзірлеме жетілдірілген Карон процесіне негізделген. Бұл тәсіл дәстүрлі жоғары температуралы балқыту әдісімен салыстырғанда энергия шығынын азайтып, никель мен өзге де пайдалы компоненттерді тиімді алуға мүмкіндік береді.
Технология никельден бөлек темір мен магний өндіруге де жол ашады. Бұл металдар жоғары қосылған құны бар өнімдер шығаруда қолданылуы мүмкін.
Жоба жетекшісі Иван Сетияванның айтуынша, жаңа шешімнің негізгі мақсаты – табиғи ресурстарды барынша тиімді пайдалану және өндірістік қалдықтардың көлемін азайту.
«Біздің мақсатымыз – құнды ресурстарды ысырап етпеу. Никель, темір және магний сұранысқа ие өнімдерге айналады, ал өндіріс қалдықтары едәуір қысқарады», – деді ол.
Технология зертханалық сынақтан сәтті өтіп, пилоттық қондырғыда 10-100 келі аралығындағы никель кені өңделді. Сынақ нәтижелері әзірлеменің техникалық тұрғыдан тиімді екенін көрсетті.
Енді мамандар технологияның экономикалық тиімділігін бағалап, оны өнеркәсіптік деңгейде енгізуге арналған пилоттық зауыт салуды жоспарлап отыр.
