ADYM.KZ / Гонконгтың ұлттық әуе компаниясы Cathay Қазақстанға тұрақты жүк және жолаушылар рейстерін ашуды жоспарлап отыр. Бұл туралы ҚР Көлік министрлігі хабарлады.
Министрліктің мәліметінше, 2026 жылғы 1 тамыздан бастап компания «Боинг-747» ұшағымен Гонконг – Астана бағыты бойынша аптасына бес ретке дейін тұрақты жүк рейстерін орындауды көздеп отыр.
Ал 2027 жылғы қаңтардан бастап «Эйрбас A330» ұшағымен Гонконг – Алматы бағыты бойынша аптасына үш мәрте тұрақты жолаушылар рейсін іске қосу жоспарланған.
Қазақстан тарапы жаңа бағыттарды ашуға қажетті қолдау көрсетуге дайын екенін мәлімдеді. Қазіргі уақытта рейстерді іске қосуға қатысты тиісті рәсімдер жүргізіліп жатыр.
Көлік министрлігінің мәліметінше, жаңа әуе бағыттарының ашылуы Қазақстан мен Гонконг арасындағы сауда-экономикалық байланыстарды, туризмді және логистикалық ынтымақтастықты дамытуға серпін береді.
Айта кетейік, Cathay – Гонконгтың ұлттық әуе компаниясы әрі Азиядағы жетекші халықаралық әуе тасымалдаушыларының бірі. Компания еншілес ұйымдарымен бірге 237 әуе кемесін пайдаланып, әлемнің 100-ден астам бағытына жолаушылар тасымалдайды. Ал Cathay Cargo 41 бағыт бойынша тұрақты жүк рейстерін орындап, жыл сайын 1,67 миллион тоннадан астам жүк тасымалдайды.
