ADYM.KZ / Премьер-министр Олжас Бектенов Астанада өтетін «Болашақ ойындары – 2026» халықаралық фиджитал турниріне дайындық барысымен танысты.
29 шілдеде басталатын халықаралық жарыс дәстүрлі спорт пен цифрлық технологияларды ұштастыратын фиджитал форматында өтеді. Турнирге Еуропа, Азия, Таяу Шығыс және Латын Америкасының 35 елінен мыңға жуық спортшы қатысады.
Ұйымдастырушылардың мәліметінше, салтанатты ашылу рәсіміне шет мемлекеттердің ресми өкілдері, халықаралық спорт ұйымдарының басшылары және цифрлық индустрияның жетекші мамандары келеді.
Жарыстар елордадағы төрт спорт нысанында ұйымдастырылады. Атап айтқанда, қатысушылар «Барыс Аренада», «QAZAQSTAN» жеңіл атлетикалық спорт кешенінде, Жекпе-жек сарайында және Ұлттық теннис орталығында бақ сынайды.
Турнирдің жалпы жүлде қоры 4 миллион доллардан асады. Қазақстан намысын 11 команда қорғайды.
Ұйымдастырушылардың болжамынша, халықаралық жарысты тамашалау үшін Астанаға 10 мыңға жуық шетелдік турист келеді.
