ADYM.KZ / Мемлекет басшысы Қасым-Жомарт Тоқаев Ауыл шаруашылығы министрі Айдарбек Сапаровты қабылдап, биылғы бірінші жартыжылдықтағы агроөнеркәсіп кешенінің даму қорытындылары жөніндегі есебін тыңдады. Бұл туралы Ақорданың баспасөз қызметі хабарлады.
Кездесу барысында Президентке егістік алқаптарын әртараптандыру, шаруаларды жеңілдетілген несиемен қамтамасыз ету, ауыл шаруашылығы техникасының лизингін кеңейту және өңделген өнім көлемін ұлғайту бағытында атқарылып жатқан жұмыстар таныстырылды.
Министрдің мәліметінше, өңделген ауыл шаруашылығы өнімінің үлесін 70 пайызға дейін жеткізуге бағытталған шаралар жүзеге асырылып жатыр. 2026 жылдың алғашқы алты айында тағам өнімдерін өндіру көлемі 14,7 пайызға артқан.
Осы кезеңде ауыл шаруашылығының нақты көлем индексі 4,4 пайызға өссе, оның ішінде егін шаруашылығы – 7,7 пайызға, мал шаруашылығы 4,4 пайызға ұлғайған.
Сондай-ақ агроөнеркәсіп кешені өнімдерінің экспорты да өсім көрсеткен. Биылғы қаңтар–сәуір айларында экспорт көлемі 3 миллиард долларға жетіп, өткен жылдың осы кезеңімен салыстырғанда 36 пайызға артқан. Жыл соңына дейін бұл көрсеткішті 7,2 миллиард долларға жеткізу жоспарланып отыр.
Кездесуде мал шаруашылығын дамытудың кешенді жоспарының орындалуы, ветеринария саласын 2030 жылға дейін дамыту бағдарламасы және агроөнеркәсіп кешенін цифрландыру жұмыстары туралы да баяндалды. Қазіргі таңда «Е-АӨК» бірыңғай цифрлық платформасы аясында мемлекеттік ақпараттық жүйелер мен жаңа цифрлық сервистер біріктіріліп жатыр.
Болжам бойынша, жыл соңына дейін ауыл шаруашылығының жалпы өнім көлемі 5,9 пайызға өседі. Сонымен қатар тағам өнімдері өндірісін 9,5 пайызға, сусын өндірісін 10,5 пайызға арттыру және салаға 2,2 триллион теңге инвестиция тарту көзделген.
Кездесу қорытындысында Қасым-Жомарт Тоқаев ауыл шаруашылығының тиімділігін арттыру, қосылған құны жоғары өнім өндірісін дамыту, экспорттық әлеуетті кеңейту және елдің азық-түлік қауіпсіздігін нығайту бағытында нақты тапсырмалар берді.
