ADYM.KZ / І топтағы мүгедектігі бар азаматтар енді әлеуметтік маңызы бар пойыздардағы арнайы орындарға билетті онлайн рәсімдей алады. Бұл туралы Бас көлік прокуратурасы хабарлады.
Ведомствоның мәліметінше, бұған дейін арнайы орындарға билет сатып алу үшін жолаушылар теміржол кассасына жеке баруға міндетті болған. Қадағалау актісінен кейін Көлік министрлігі электрондық билеттеу жүйесіне тиісті өзгерістер енгізіп, мүгедектігі бар жолаушыларды автоматты түрде анықтайтын тетікті іске қосты.
2026 жылдың маусымынан бастап әлеуметтік маңызы бар пойыздардағы арнайы орындарға билеттерді интернет арқылы рәсімдеу қызметі қолжетімді болды. Бұл мүмкіндік «Қазақстан темір жолы» компаниясының электрондық билеттеу жүйесін Еңбек және халықты әлеуметтік қорғау министрлігінің ақпараттық жүйесімен ықпалдастыру нәтижесінде жүзеге асқан.
Жаңа қызметтің арқасында І топтағы мүгедектігі бар шамамен 90 мың азамат теміржол билеттерін үйден шықпай-ақ онлайн сатып ала алады. Бұл олардың сапарды жоспарлауын жеңілдетіп, мемлекеттік қызметтердің қолжетімділігін арттыруға мүмкіндік береді.
