ADYM.KZ / Қытай алдағы бес жыл ішінде дамушы елдердің өкілдеріне жасанды интеллект (ЖИ) саласындағы курстар мен семинарларға қатысу үшін 5 мың орын бөлмек.
Бұл туралы Қытай төрағасы Си Цзиньпин Шанхайда өткен 2026 жылғы жасанды интеллект бойынша дүниежүзілік конференция мен ЖИ-ді жаһандық басқару жөніндегі жоғары деңгейлі конференцияның ашылу рәсімінде мәлімдеді.
Қытай көшбасшысының айтуынша, бастама дамушы мемлекеттердің жасанды интеллект технологияларын игеруіне және осы саладағы мамандар даярлауына бағытталған.
Си Цзиньпин сондай-ақ Қытай ШЫҰ, БРИКС, АСЕАН, Араб лигасы, Африка одағы және Латын Америкасы мен Кариб бассейні мемлекеттері қауымдастығы елдерімен жасанды интеллектті қолдану бағытындағы халықаралық ынтымақтастық орталықтарын құруды жоспарлап отырғанын айтты.
Сонымен қатар Қытай әлемнің 30 елінде табиғи апаттардың алдын алуға арналған «Мацзу» интеллектуалды метеорологиялық ерте ескерту жүйесін енгізуге ықпал ететінін мәлімдеді.
Аталған бастамалар Қытайдың жасанды интеллект саласындағы халықаралық әріптестікті күшейту және технологияларды бірлесіп дамыту бағытын ұстанып отырғанын көрсетеді.
