ADYM.KZ / 2027 жылы Астана олимпиадалық спорт түрлері бойынша бірден алты әлем чемпионатын қабылдайды. Бұл туралы Туризм және спорт министрлігі хабарлады.
Ведомствоның мәліметінше, елордада шорт-трек, бокс, үстел теннисі, дзюдо, таеквондо және киберспорттан әлем біріншіліктері өтеді.
Жарыстардың алдын ала күнтізбесі төмендегідей:
шорт-тректен жасөспірімдер арасындағы әлем чемпионаты – 28–31 қаңтар;
бокстан әлем чемпионаты – 10–26 сәуір;
үстел теннисінен әлем чемпионаты – 22–30 мамыр;
дзюдодан әлем чемпионаты – 1–14 маусым;
таеквондодан әлем чемпионаты – 7–13 шілде.
Ал киберспорттан әлем чемпионатының нақты өтетін мерзімі кейінірек жарияланады.
Министрліктің мәліметінше, биыл Қазақстан күрес түрлерінен әлем чемпионатын қабылдайды. Осылайша тәуелсіз Қазақстан тарихында ел екі жылдың ішінде жеті әлем чемпионатын өткізу құқығына ие болып отыр.
Ведомство мұны Қазақстанның заманауи спорт инфрақұрылымы мен халықаралық деңгейдегі ірі спорттық іс-шараларды ұйымдастыру әлеуетінің жоғары екенін көрсететін маңызды жетістік ретінде бағалайды.
Күтіліп отырған әлем чемпионаттарына дүниежүзінің үздік спортшылары қатысады. Сонымен қатар мұндай халықаралық додалар оқиғалық туризмді дамытуға, қонақүй және қызмет көрсету саласының жандануына, инфрақұрылымды жетілдіруге әрі Қазақстанның халықаралық имиджін нығайтуға оң ықпал етеді.
