ADYM.KZ / Астанада 6–9 тамыз аралығында Орталық Азиядағы ең ірі поп-мәдениет фестивальдерінің бірі – Comic Con Astana 2026 өтеді. Биылғы фестивальдің алғашқы жұлдызды қонақтарының қатарында британдық әрі испаниялық актер Таз Скайлар мен оңтүстіккореялық Kandis K-pop тобы бар. Бұл туралы Астана әкімдігінің ресми сайты хабарлады.
Таз Скайлар әлемдік аудиторияға Netflix платформасындағы One Piece сериалында Санджи рөлін сомдау арқылы кеңінен танылды. Сонымен қатар ол Boiling Point («Қайнау нүктесі»), Cleaner («Тазалаушы»), The Kill Team («Өлім тобы») және Agatha Raisin жобаларындағы рөлдерімен де белгілі.
Актер шығармашылық жолында сценарист, режиссер және продюсер ретінде де еңбек етіп келеді. Сондай-ақ экстремалды спорт түрлерімен айналысады.
Фестиваль аясында Таз Скайлар жанкүйерлерімен арнайы кездесуге қатысып, сұрақтарға жауап береді. Сондай-ақ қолтаңба тарату және фотосессиялар ұйымдастырылады.
Comic Con Astana 2026 қонақтарының қатарында халықаралық Silk Way Star телевизиялық вокал байқауында Оңтүстік Кореяның атынан өнер көрсеткен Kandis K-pop тобы да бар.
Дәстүрлі түрде фестиваль Barys Arena мен «Алау» мұз сарайында өтеді. Бағдарламаға кино, сериал, аниме, комикс, бейнеойын және косплей бағытындағы іс-шаралар енген.
Фестивальдің басты оқиғаларының бірі саналатын халықаралық косплей байқауының жүлде қоры 20 миллион теңгені құрайды. Comic Con Astana 2026 фестиваліне билеттер ресми сайтта сатылымға шыққан.
