ADYM.KZ / Әлемдегі жетекші халықаралық ақпараттық телеарналардың бірі – Euronews енді қазақ тілінде контент ұсына бастайды. Бұл туралы Орталық коммуникациялар қызметінде өткен баспасөз конференциясында ҚР Мәдениет және ақпарат министрінің бірінші вице-министрі Қанат Ысқақов мәлімдеді.
Оның айтуынша, қазіргі уақытта Euronews Қазақстан аумағында орыс тілінде хабар таратады. Ал жаңа жоба аясында арнаның интернет-платформасында қазақ тіліндегі халықаралық жаңалықтар, сұхбаттар және арнайы шығарылымдар жарияланатын болады.
«Бұл – отандық медиа кеңістік пен мемлекеттік тілдің дамуы үшін маңызды әрі тарихи қадам. Жоба қазақ тілінің қолданылу аясын кеңейтіп қана қоймай, оның халықаралық ақпарат кеңістігіндегі орнын нығайтуға мүмкіндік береді», – деді Қанат Ысқақов.
Вице-министрдің сөзінше, бастама уақытша үрдіс емес, мемлекеттік тілді дамытуға бағытталған ұзақмерзімді жоба. Сонымен қатар ол еліміздің ақпараттық қауіпсіздігін күшейтуге де ықпал етеді.
Сондай-ақ Қанат Ысқақов жаңа жобаның Қазақстан Конституциясының жаңартылған редакциясы күшіне енген кезеңмен тұспа-тұс келуінің символдық мәні бар екенін атап өтті.
Өз кезегінде Euronews директорлар кеңесінің төрағасы Варгас Педро Қазақстанның соңғы жылдардағы даму қарқынына жоғары баға беріп, қазақ тілінде хабар тарату туралы шешім компания үшін де маңызды кезең екенін айтты.
Оның мәліметінше, бұған дейін Euronews әлемнің 14 тілінде хабар таратып келген. Енді олардың қатарына қазақ тілі де қосылды.
«Қазақ тілі – Еуразия кеңістігіндегі маңызды тілдердің бірі. Біз халықаралық аудиторияға ұсынылатын тілдердің қатарын кеңейтіп отырмыз. Енді қазақтілді аудитория әлемдегі маңызды жаңалықтарды өз ана тілінде оқып, көре алады. Бұл қазақ тілінің халықаралық ақпарат кеңістігіндегі орнын нығайтатын маңызды қадам», – деді Варгас Педро.
