ADYM.KZ / Қазақстан БҰҰ ұйымдастырған жасанды интеллектті (ЖИ) басқару мәселелері жөніндегі алғашқы жаһандық диалогқа қатысып жатыр. Женевада өтіп жатқан халықаралық жиында еліміздің атынан Премьер-министрдің орынбасары – Жасанды интеллект және цифрлық даму министрі Жаслан Мәдиев сөз сөйледі.
Форумның ашылуында БҰҰ Бас хатшысы Антониу Гутерриш жасанды интеллект технологияларының қарқынды дамып жатқанын айтып, оны «адамзаттың нақты жоспары жоқ ауқымды тәжірибесі» деп сипаттады. Оның айтуынша, бүгінде басты міндет – ЖИ-ды қауіпсіз әрі жауапты пайдалануға арналған ортақ халықаралық қағидаларды қалыптастыру.
Жаслан Мәдиев өз баяндамасында Қазақстанның цифрландыру және жасанды интеллект саласындағы негізгі жетістіктерін таныстырды. Оның айтуынша, елімізде Цифрлық кодекс, «Жасанды интеллект туралы» және «Киберқауіпсіздік туралы» заңдар қабылданған. Сонымен қатар мемлекеттік қызметтердің 92 пайызы онлайн форматта қолжетімді.
Жаһандық диалог аясында БҰҰ Бас хатшысы Антониу Гутерриш Қазақстан делегациясымен жеке кездесу өткізіп, цифрландыру саласындағы ынтымақтастықты одан әрі дамыту мәселелерін талқылады.
Жаслан Мәдиевтің айтуынша, Қазақстан БҰҰ үшін цифрлық экожүйені дамытуға арналған өңірлік хабқа айналып келеді. Оның пікірінше, форумға қатысу елімізге өзге мемлекеттермен бірлесіп жасанды интеллект саласындағы жаһандық саясатты қалыптастыруға және азаматтардың қауіпсіздігін қамтамасыз етуге бағытталған ортақ ұстанымдарды әзірлеуге мүмкіндік береді.
Сондай-ақ министр елімізде суперкомпьютерлік кластерлерді дамыту, Деректер орталықтары алқабын құру және Транскаспий талшықты-оптикалық байланыс желісін іске қосу бағытындағы жобалар жүзеге асырылып жатқанын атап өтті. Бұл бастамалар Қазақстанның халықаралық интернет-трафик транзитіндегі әлеуетін арттыруға мүмкіндік береді.
Қазақстан делегациясы Женевадағы Digital Week бағдарламасы аясындағы іс-шараларға қатысуын жалғастырады. Алдағы күндері ел өкілдері AI for Good жаһандық форумында және Ақпараттық қоғам мәселелері жөніндегі дүниежүзілік жоғары деңгейдегі кездесуде Қазақстанның цифрлық даму саласындағы ұстанымы мен тәжірибесін таныстырады.
