Түркістан қаласында жалпы аумағы 50 гектарды құрайтын «Түркістан» экопаркінің құрылысы қарқынды жүріп жатыр. Заманауи демалыс орны «Таза Қазақстан» экологиялық бағдарламасы аясында бой көтеруде, деп хабарлайды Adym.kz тілшісі.Бүгінгі таңда парктің болашақ аумағы толықтай қоршалып, алғашқы 1000 түп ағаш көшеті отырғызылды. Жобалық жоспар бойынша, алдағы уақытта бұл жерге 10 мыңға жуық ағаш егіледі. Өңірдің ыстық әрі құрғақ климаты ескеріліп, табиғи жағдайға тез бейімделетін тораңғы, үйеңкі, акация, терек және өрік ағаштары таңдап алынған.
Бұл жасыл желектер қаланың ауа райын жақсартып, шаң-тозаңнан қорғайтын табиғи қалқанға айналмақ.
Экопарктің басты ерекшелігі — мұндағы инфрақұрылымның қоршаған ортаға еш зиян келтірмейтін технологиялармен жабдықталуында: Саябақты жарықтандыру үшін толықтай күн панельдерімен жұмыс істейтін үнемді шамдар орнатылуда. Демалушыларға арналған орындықтар, жаяу жүргіншілер көпірлері, тас пен ағаштан қашалған мүсіндер мен сәулет нысандары тек экологиялық таза өнімдерден жасалады. Қала тұрғындары мен туристер үшін арнайы барбекю (кәуап пісіру) орындары мен серуендеу алаңдары қарастырылған.
Сондай-ақ саябақ ішіндегі су айдынына жақында ғана аққулар жіберілді. Мамандардың пікірінше, бұл қадам жаңа рекреациялық аймақтың фаунасын байытып, демалыс орнының табиғи көркін аша түседі және келушілер үшін негізгі тартымдылық орталығының біріне айналады.
Айта кетейік, Түркістанды жасыл қалаға айналдыру бағытындағы бұл ірі жоба аймақтың экологиялық тепе-теңдігін сақтаумен қатар, жергілікті туризмнің әлеуетін жаңа деңгейге көтермек.
