ADYM.KZ / «Ұлттық қолөнер мектебі»: Қазақстанның үздік 10 шебері анықталды.АСТАНА – «Креативті индустрияларды дамыту қоры» корпоративтік қоры дәстүрлі қолөнерді сақтау, дамыту және оны жас ұрпаққа насихаттауға бағытталған «Ұлттық қолөнер мектебі» республикалық жобасының іріктеу кезеңін қорытындылады.
Ашық конкурсқа еліміздің барлық өңірінен қолөнер шеберлері қатысуға өтінім берген. Жалпы 330 өтінім қабылданса, техникалық сараптамадан кейін конкурстық комиссия 271 өтінімді қарады.
Іріктеу нәтижесінде жобаға қатысатын үздік 10 шебер анықталды. Олар жуырда Астанадағы Qazaq Creative Hub алаңында арнайы білім беру бағдарламасын бастайды. Бағдарлама аясында шеберлер 8–20 жас аралығындағы балалар мен жастарға ұлттық қолөнердің қыр-сырын үйретеді.
Жобаға қатысуға ең көп өтінім еліміздің оңтүстік өңірлерінен түскен. Бұл өңірлерден 137 өтінім қабылданып, жалпы көрсеткіштің 51 пайызын құрады.
Қолөнер бағыттарының ішінде дәстүрлі тоқыма өнері мен киіз басу ісіне қызығушылық жоғары болды. Аталған бағыт бойынша 121 өтінім немесе барлық өтінімнің 44,6 пайызы тіркелді. Сонымен қатар сәндік-қолданбалы өнер мен этнодекор бағытына 42 өтінім (15,5%), ұлттық киімдер мен аксессуарлар әзірлеуге 31 өтінім (11,4%), ал зергерлік өнер бойынша 20 өтінім (7,4%) келіп түсті.
Жоба ұлттық қолөнерді сақтауға, шеберлердің тәжірибесін кейінгі буынға жеткізуге және шығармашылық әлеуеті бар жастарды қолдауға бағытталған.
