ADYM.KZ / Мемлекет басшысы Қасым-Жомарт Тоқаевтың жарлықтарымен Қазақстанның бірнеше шет мемлекеттегі елшілері тағайындалып, бірқатар дипломат қызметінен босатылды. Бұл туралы Ақорданың баспасөз қызметі хабарлады.
Президенттің жарлығына сәйкес, Әбілқайыр Сқақов Қазақстанның Қырғыз Республикасындағы Төтенше және Өкілетті Елшісі болып тағайындалды.
Бақыт Батыршаев Қазақстанның Қатар Мемлекетіндегі Төтенше және Өкілетті Елшісі қызметіне кірісті.
Анель Бақытбекқызы Қазақстанның Мажарстандағы Төтенше және Өкілетті Елшісі болып тағайындалды.
Ал Болат Иманбаев Қазақстанның Сербия Республикасындағы Төтенше және Өкілетті Елшісі қызметіне тағайындалып, осыған дейін атқарған Армения Республикасындағы елші лауазымынан босатылды.
Сонымен қатар Қазақстанның Үндістандағы Төтенше және Өкілетті Елшісі Азамат Есқараевқа Бангладеш, Бутан, Мальдив және Непалдағы Қазақстанның Төтенше және Өкілетті Елшісі қызметін қоса атқару міндеті жүктелді.
Сондай-ақ Президенттің жарлықтарымен Рәпіл Жошыбаев Қырғызстандағы, Арман Исағалиев Қатардағы, Абзал Сапарбекұлы Мажарстандағы және Мәди Атамқұлов Сербиядағы Қазақстанның Төтенше және Өкілетті Елшісі қызметтерінен босатылды.
