ADYM.KZ / Солтүстік Америкада өтіп жатқан 2026 жылғы футболдан әлем чемпионатының плей-офф кезеңі алғашқы ірі сенсацияларымен есте қалды. 1/16 финалдың кезекті ойын күнінде Еуропаның екі алпауыты – Германия мен Нидерланд құрамалары жарысты мерзімінен бұрын аяқтады. Ал Бразилия құрамасы Жапонияны тек қосымша уақыттың соңғы сәтінде жеңіп, келесі кезеңге жолдама алды.
Алғашқы кездесуде Бразилия мен Жапония құрамалары кездесті. Ойынның 29-минутында Каишу Сано есеп ашып, жапондықтарды алға шығарды. Бразилиялықтар үзілістен кейін ғана таразы басын теңестіре алды. 56-минутта Каземиро мергендігімен көзге түссе, матчтың тағдыры қосылған уақыттың алтыншы минутында шешілді. Габриэль Мартинелли жеңіс голын соғып, оңтүстікамерикалықтарды келесі кезеңге шығарды. Дегенмен, Карло Анчелотти шәкірттерінің қорғаныстағы ойыны әлі де алаңдаушылық туғызатыны байқалды.
Кештің басты сенсацияларының бірі Бостонда тіркелді. Турнир фавориттерінің қатарындағы Германия құрамасы Парагвайдан өте алмады. Негізгі уақыт 1:1 есебімен аяқталып, жеңімпаз пенальти сериясында анықталды. Шешуші сәтте парагвайлық футболшылар жүйкеге берік екенін дәлелдеп, 4:3 есебімен басым түсті. Осылайша Юлиан Нагельсманн баптайтын Германия құрамасы әлем чемпионатымен күтпеген жерден қоштасты.
Тағы бір тартысты кездесу Монтеррейде өтті. Нидерланд пен Марокко арасындағы матчтың негізгі уақыты да 1:1 есебімен аяқталды. Пенальти сериясында марокколықтар 3:2 есебімен жеңіске жетіп, ширек финалға жолдама алды. Осылайша, 2022 жылғы әлем чемпионатында жартылай финалға дейін жеткен Марокко құрамасы тағы да өзінің жоғары деңгейін дәлелдеп, Еуропаның тағы бір мықты командасын жарыстан шығарды.
Кешегі ойындар әлем чемпионатының плей-офф кезеңінде фаворит атағы жеңіске кепіл болмайтынын тағы бір мәрте көрсетті. Парагвай мен Марокконың тактикалық сауаттылығы мен психологиялық дайындығы шешуші сәттерде өз нәтижесін берсе, Бразилия құрамасы соңғы секундтағы голдың арқасында келесі кезеңге өтті.
1/16 финалдың кешегі нәтижелері:
Бразилия – Жапония – 2:1;
Германия – Парагвай – 1:1 (пенальти – 3:4);
Нидерланд – Марокко – 1:1 (пенальти – 2:3).
