ADYM.KZ / Қазақстан Премьер-министрі Олжас Бектеновтің Қытайға жұмыс сапары барысында екіжақты сауда-экономикалық ынтымақтастықты кеңейту мәселелері талқыланды.
Бектенов Қытай Халық Республикасының Мемлекеттік кеңесінің Премьері Ли Цянмен кездесіп, жоғары деңгейде қол жеткізілген келісімдердің орындалу барысын және сауда, инвестиция, агроөнеркәсіп, көлік-логистика салаларындағы өзара іс-қимылды дамыту перспективаларын қарастырды.
Кездесуде Қазақстандағы инвестициялық ахуалды жақсарту, шетелдік инвесторлардың құқықтарын қорғау және заң үстемдігін күшейту бағытында жүргізіліп жатқан реформаларға назар аударылды. Бектеновтің айтуынша, Қазақстан мен Қытай арасындағы мәңгілік әрі жан-жақты стратегиялық серіктестік жаңа «алтын отызжылдық» кезеңіне қадам басты.
Өз кезегінде Ли Цян екі ел арасындағы өзара сенім мен тату көршілік қатынастардың жоғары деңгейін атап өтіп, көпқырлы ынтымақтастықты одан әрі тереңдетуге дайын екенін жеткізді.
Қытай Қазақстанның негізгі сауда және инвестициялық серіктестерінің бірі болып қала береді. 2025 жылдың қорытындысы бойынша екі ел арасындағы сауда көлемі 48 млрд доллардан асып, Қытайдан тартылған тікелей инвестиция көлемі 2,8 млрд долларға жетті. Агроөнеркәсіп саласындағы тауар айналымы 36%-ға өсіп, 1,9 млрд доллардан асты.
Көлік-логистика бағытында да оң динамика байқалады. Былтыр Қазақстан мен Қытай арасындағы теміржол арқылы жүк тасымалы 11%-ға артып, 35,6 млн тоннаға жеткен. Қазақстан аумағы арқылы Қытай мен Еуропа арасындағы құрлық жүк ағынының 85%-дан астамы өтеді.
Сапар аясында Олжас Бектенов Далянь қаласында өткен «Бір белдеу – бір жол» бастамасына арналған халықаралық сессияға қатысты. Ол Қазақстанның Еуразияның маңызды транзиттік торабына айналғанын атап өтіп, соңғы жеті жылда көлік-транзит инфрақұрылымын дамытуға 35 млрд доллардан астам инвестиция салынғанын айтты.
Премьер-министр бастаманы одан әрі дамытудың бес негізгі бағытын атады: инфрақұрылымдық байланысты күшейту, цифрлық дәліздерді дамыту, «жасыл» күн тәртібін ілгерілету, сауда мен инвестицияны кеңейту және қаржылық ынтымақтастықты нығайту.
Сессия барысында қатысушылар «Бір белдеу – бір жол» жобасының 2040 жылға дейінгі даму перспективаларын, жеткізу тізбектерін жаңғырту және цифрлық инфрақұрылымды дамыту мәселелерін талқылады.
