ADYM.KZ / Қазақстан Ұлттық банкі Ресейдегі экономикалық ахуалды жіті бақылап отырғанымен, қазіргі жағдайда теңге бағамының әлсіреуіне немесе ақша-кредит саясатын шұғыл өзгертуге негіз жоқ. Бұл туралы Парламент палаталарының бірлескен отырысынан кейін журналистерге Ұлттық банк төрағасы Тимур Сүлейменов мәлімдеді.
Оның айтуынша, Ресей – Қазақстанның негізгі сауда серіктестерінің бірі болғандықтан, көрші елдегі инфляцияның жеделдеуі мен логистикалық шектеулердің күшеюі белгілі бір деңгейде Қазақстан экономикасына да әсер етуі мүмкін.
«Ресеймен экспорт пен импорт көлемі өте үлкен. Егер көрші елде инфляция күшейіп, баға өссе, оның әсері бізге де сезілуі ықтимал. Алайда бұл өзгерістердің нақты қандай тауарларға және қандай деңгейде ықпал ететінін дәл қазір болжау мүмкін емес. Ресейдің өзінде де бұл мәселеге қатысты нақты болжам жасалып отырған жоқ», – деді Тимур Сүлейменов.
Ұлттық банк төрағасы реттеуші орган барлық макроэкономикалық көрсеткіштерді тұрақты түрде талдап отырғанын айтып, қандай да бір шешімдер нақты статистикалық мәліметтер мен экономикалық үдерістердің даму қарқынына сүйене отырып қабылданатынын жеткізді.
Сонымен қатар ол Ресейдегі қазіргі жағдай теңге бағамына елеулі қысым түсірмейді деген пікір білдірді.
«Экономикамыздың іргелі көрсеткіштері тұрақты. Биыл төлем балансы аздаған профицитпен немесе нөлге жуық деңгейде қалыптасады деп күтіп отырмыз. Бұл еліміздегі валюта нарығының тұрақтылығын қамтамасыз ететін маңызды факторлардың бірі», – деді Ұлттық банк басшысы.
Тимур Сүлейменов инфляциялық тәуекелдерді де асыра бағаламауға шақырды. Оның айтуынша, елімізде егін жинау науқаны жүріп жатыр және ішкі нарық негізгі азық-түлік өнімдерімен жеткілікті деңгейде қамтамасыз етілген. Сондықтан қазіргі жағдайда бағаның күрт өсуіне алғышарттар байқалмайды.
