ADYM.KZ / Қытайдың Циндао қаласында өтіп жатқан дзюдодан Гран-при турнирінде Қазақстан құрамасының спортшылары жарысты жалғастырып жатыр. Турнирдің кезекті жарыс күнінде Ғұсман Қырғызбаев жартылай финалға жолдама алса, Елдос Сметов жұбаныш белдесуінде бақ сынайды.
66 келіге дейінгі салмақ дәрежесінде Париж-2024 Олимпиадасының қола жүлдегері Ғұсман Қырғызбаев ширек финалда Әзербайжан өкілі Руслан Пашаевты жеңіп, жартылай финалға шықты. Енді ол финал жолдамасы үшін бразилиялық Рональд Лимамен белдеседі.
Ал 60 келіге дейінгі салмақта Олимпиада чемпионы Елдос Сметов жарысты сәтті бастаған болатын. Алғашқы белдесуінде ол Қытай спортшысы Сунь Цзяхаоны, кейін әзербайжандық Балабай Агаевты жеңіп, ширек финалға дейін жетті.
Алайда ширек финалдағы белдесуден кейін Сметов алтын жүлде үшін күресті жалғастыра алмады. Енді қазақстандық дзюдошы қола жүлдеге таласу мүмкіндігін сақтап қалу үшін жұбаныш белдесуіне қатысады.
Айта кетейік, бұл турнир Елдос Сметов үшін Париж-2024 Олимпиадасындағы тарихи жеңісінен кейінгі алғашқы халықаралық жарыс болып отыр.
Сонымен қатар әйелдер арасында 48 келіге дейінгі салмақ дәрежесінде Қазақстан құрамасының көшбасшысы Әбиба Әбужақынова алғашқы айналымнан аса алмады. Ол Әзербайжан спортшысы Шафаг Хамидоваға есе жіберіп, жарысты ерте аяқтады.
