ADYM.KZ / Қазақстан Республикасының Ұлттық кітапханасында Түркия Қолжазбалар институтының президенті Жошкун Йылмазбен маңызды кездесу өтті. Тараптар түркі-ислам өркениетіне тиесілі көне жазба мұраларды сақтау, зерттеу және реставрациялау бойынша өзара тәжірибе алмасты.
Басқосудың басты тақырыбы Ұлттық кітапхана қорында сақтаулы тұрған, XII ғасырға жататын бірегей Құран қолжазбасын қалпына келтіру мәселесі болды. Жиын барысында түркиялық меймандар көне жәдігерлерді ғылыми тұрғыдан зерттеу мен реставрациялау саласындағы өздерінің озық тәжірибелерімен бөлісті.
Алдағы уақытта қазақстандық құнды қолжазбаларды қалпына келтіру жұмыстарына Түркияның ең білікті реставратор мамандары тартылатын болады. Екі ел тарихи-мәдени мұраны бірлесе қорғау және ғылыми айналымға енгізу бағытындағы байланыстарды нығайтуға уағдаласты. Кездесу аясында кітапхана қорындағы ең сирек кездесетін әрі құнды жазба жәдігерлер жинақталған эксклюзивті көрме ұйымдастырылды.
Сарапшылардың пікірінше, бұл қадам ортақ түркі тарихы мен мәдениетінің алтын діңгегі болып табылатын сирек қолжазбалардың өміршеңдігін арттыруға септігін тигізеді.
