Қазақстандық футболдың жарық жұлдызы, 17 жастағы шабуылшы Дастан Сәтбаев спорттағы жетістіктерімен ғана емес, білім жолындағы жаңа қадамымен де қуантып отыр, деп хабарлайды Adym.kz ақпараттық сайты Baribar.kz -ке сілтеме жасап.
Жас талант еліміздегі жетекші жоғары оқу орындарының бірінде оқу үшін арнайы академиялық грант иегері атанды.
Салтанатты шарада грантты Қазақстан спорт және туризм академиясының президенті Қайрат Закиряновтың өзі табыстады. Академия басшысы жас спортшының қадамына сәттілік тілей отырып, қазіргі заманда үлкен спорт пен сапалы білімді қатар алып жүрудің маңыздылығына ерекше тоқталып өтті.
Естеріңізге сала кетейік, бұған дейін де Дастанның еңбегі мемлекет деңгейінде жоғары бағаланып, ол «Дарын» мемлекеттік жастар сыйлығының лауреаты атанған болатын.
Дастан Сәтбаевтың жасыл алаңдағы шеберлігі мен мақсаттылығы тек отандық мамандарды емес, халықаралық сарапшыларды да тәнті етіп үлгерді. Жақында ғана оған ағылшындық алпауыт «Челси» клубының назар аударып, шақырту жібергені белгілі болды. Бұл оқиға — отандық футбол тарихындағы айтулы жетістіктердің бірі. Көп ұзамай Дастанның Лондон клубындағы бас жаттықтырушысының есімі де жарияланды.
«Қайрат» футбол клубы мен Қазақстан жастар құрамасының бұрынғы ойыншысы Айдар Арғымбаев Дастан Сәтбаевты «Қазақстан футболы тарихындағы ең үздік жас шабуылшы» деп бағалаған болатын. Оның бұл сөзі жас футболшының әлеуеті қаншалықты жоғары екенін дәлелдей түседі.
