Халықаралық күрес стилдері қауымдастығы (UWW) ресми мәлімдеме жасап, 2026 жылғы Күрес түрлерінен әлем чемпионатын өткізу құқығын Астана қаласына берді, деп хабарлайды Adym.kz ақпараттық сайты.
Бастапқыда бұл дүбірлі дода Бахрейн астанасы Манама қаласында өтуі тиіс еді. Алайда, Таяу Шығыстағы геосаяси жағдайлар мен халықаралық әуе қатынасындағы белгісіздіктерге байланысты ұйымдастырушылар жарыс орнын шұғыл ауыстыруға шешім қабылдаған. UWW өкілдері Қазақстанға арнайы инспекциямен келіп, дайындық деңгейін жоғары бағалады. Осылайша, еліміздің бас шаһары 2019 жылғы сәтті тәжірибеден кейін, араға жылдар салып әлемдік біріншілікті екінші рет қарсы алғалы отыр.
Маңызды ақпарат: Дүниежүзілік дода 2026 жылдың 24 қазаны мен 1 қарашасы аралығында елордамыздағы «Барыс Арена» спорт кешенінде өтеді. Жарысқа әлемнің 100-ден астам елінен 1000-ға жуық үздік балуан келеді деп күтілуде.
