ADYM.KZ / Қазақстан құрамасы Германияның Зуль қаласында өтіп жатқан оқ ату спортынан жасөспірімдер арасындағы әлем чемпионатында тағы бір алтын медаль жеңіп алды.
Ел намысын қорғаған Асылым Жақия 25 метр қашықтықтан стандартты шағын калибрлі тапаншамен оқ ату сайысында 554 ұпай жинап, әлем чемпионы атанды.
Күміс жүлдені Үндістан өкілі Шауля Дилип Бхарне 552 ұпаймен иеленсе, оның отандасы Рия Дуггал дәл осындай нәтижемен қола медальға қол жеткізді.
Осылайша, Асылым Жақия Қазақстан құрамасының қоржынына әлем чемпионатындағы кезекті алтын жүлдені салды. Бұл – ұлттық құраманың Зульдегі дүниежүзілік додада жеңіп алған үшінші медалі.
Бұған дейін қазақстандық спортшылар стенд атудан әйелдер арасындағы «трап» жаттығуында алтын медаль жеңіп алған болатын. Сондай-ақ Ринат Казаченко нысана көздеуден күміс жүлдеге ие болды.
Германиядағы әлем чемпионаты әлі жалғасуда. Қазақстандық мергендердің жүлде қорын толықтыруға мүмкіндігі сақталып отыр.
