ADYM.KZ / Әлемдік технологиялық индустрияның назарын Азия өзіне аударып келеді. Сарапшылардың пікірінше, өңірдегі қарқынды экономикалық өсім, мемлекеттік қолдау және білікті мамандардың шоғырлануы Азияны жаһандық инновацияның жаңа орталығына айналдыруда.
Жаһандық инновациялық индекс деректеріне сәйкес, өткен жылы Оңтүстік Корея төртінші орынға көтерілсе, Қытай үздік ондыққа енді. Ал Сингапур әлемдегі ең инновациялық елдердің алғашқы бестігіне кірді.
Осылайша, бұрын технологиялық даму символына айналған АҚШ-тағы Кремний алқабына енді Сингапур, Қытайдың Шэньчжэнь қаласы және Үндістанның Бангалоры бәсекелес бола бастады. Бұған арзан жұмыс күші, қашықтан жұмыс істеу форматының кеңеюі және мемлекеттік қолдау бағдарламалары әсер етіп отыр.
Мәселен, Таиланд билігі «Thailand 4.0» бағдарламасы арқылы қаржылық технологиялар мен жасанды интеллект саласындағы стартаптарды қолдаса, Сингапур мемлекеттік инвестициялар арқылы инновациялық жобаларды дамытуға басымдық беруде.
Сарапшылардың айтуынша, Қытай жад технологиялары мен жоғары технологиялық өндірістерге ірі көлемде инвестиция салып келеді. Ал Оңтүстік Корея жасанды интеллект пен жартылай өткізгіштер өндірісін стратегиялық басымдық ретінде белгілеген.
Биыл әлемдік нарықтағы чиптерге сұраныстың артуы оңтүстіккореялық Samsung пен SK Hynix компанияларына рекордтық табыс әкелді. Сонымен қатар Samsung Electro-Mechanics америкалық технологиялық корпорациялардың бірімен шамамен 993 миллион доллар көлемінде келісімшарт жасасқанын хабарлады.
Сарапшылардың бағалауынша, Оңтүстік Корея 2035 жылға қарай әлемдегі ең дамыған бес экономиканың қатарына қосылуды мақсат етіп отыр.
Сонымен қатар инновациялық рейтингтерде еуропалық елдер де көшбасшылық позициясын сақтап келеді. Соңғы 15 жыл бойы Швейцария жаһандық инновациялық индекстің көшін бастап тұр. Үздік ондыққа Швеция, Ұлыбритания, Финляндия, Нидерланд және Дания да енген.
Технологиялық бәсекеде АҚШ әлі де жетекші орындардың бірін сақтап отыр. Дегенмен сарапшылар Қытайдың қарқынды дамуы алдағы жылдары жаһандық технологиялық тепе-теңдікке елеулі әсер етуі мүмкін екенін айтады.
