Мемлекет басшысы Қасым-Жомарт Тоқаев Mediterranean Shipping Company (MSC) компаниясының аға вице-президенті Эдуард Зигристті қабылдады. Кездесуде көлік және логистика саласындағы ынтымақтастықты кеңейту мәселелері талқыланды, деп хабарлайды Adym.kz ақпараттық сайты Ақордаға сілтеме жасап.
Ақорданың мәліметінше, тараптар жүк айналымын арттыру және контейнерлеу деңгейін көтеру бағытындағы бірлескен жұмыстың перспективаларын қарастырды.
Президент контейнерлік тасымал саласындағы әлемдік көшбасшылардың бірі саналатын MSC компаниясының Қазақстан нарығындағы қызметіне оң баға беріп, Орта дәлізді дамыту еліміздің стратегиялық басымдықтарының бірі екенін атап өтті.
Кездесу барысында Қасым-Жомарт Тоқаев Транскаспий халықаралық көлік бағытының әлеуетін күшейту үшін қолға алынған шаралар туралы айтты. Атап айтқанда, Қазақстан, Әзербайжан және Грузия арасында бірыңғай ұзақмерзімді тарифтік модель енгізу мәселесі пысықталуда.
Сонымен қатар Каспий теңізіндегі жүк флоты кеңейтіліп, Әзербайжанмен бірлесіп теңіз табанын тереңдету жұмыстары жүргізілуде. Сондай-ақ Құрық портын жаңғыртуға бағытталған инфрақұрылымдық жобалар жүзеге асырылып жатыр.
Мемлекет басшысы MSC компаниясының Каспий маңындағы порт инфрақұрылымына инвестиция салуға қызығушылығын құптап, мұндай бастамалар Орта дәліздің бәсекеге қабілеттілігін арттырып, Азия мен Еуропа арасындағы жүк тасымалы көлемінің өсуіне ықпал ететінін айтты.
Өз кезегінде Эдуард Зигрист компанияның Қазақстанға қатысты ұзақмерзімді инвестициялық жоспарын таныстырды. Жоспар аясында логистикалық терминалдарға, теміржол активтеріне, порт инфрақұрылымына, теңіз қызметтеріне және әуе жүк тасымалы саласына инвестиция салу көзделген.
