ADYM.KZ / Қазақстанда цифрландыру мен жасанды интеллект саласын дамыту қарқынды жалғасып жатыр. Бұл туралы Премьер-министр Олжас Бектенов ҚР Парламенті Палаталарының 2025 жылғы республикалық бюджеттің атқарылуы туралы бірлескен отырысында мәлімдеді.
Үкімет басшысының айтуынша, Мемлекет басшысының тапсырмасына сәйкес елде цифрландыру мен жасанды интеллектіні дамытуға қажетті құқықтық база қалыптастырылды. Атап айтқанда, Цифрлық кодекс пен «Жасанды интеллект туралы» заң қабылданып, Digital Kazakhstan жалпыұлттық стратегиясы бекітілді. Сондай-ақ Президенттің шешімімен биылғы жыл цифрландыру және жасанды интеллект жылы болып жарияланды.
Премьер-министр кадр даярлау мәселесіне де ерекше тоқталды. Оның сөзінше, AI Sana бағдарламасы аясында 1 миллионнан астам адам жасанды интеллектімен жұмыс істеудің негізгі дағдыларын меңгерген. Бұл бағыттағы оқыту жұмыстары мектептер мен жоғары оқу орындарында жалғасады.
Сонымен қатар Олжас Бектенов IT экспортының айтарлықтай өскенін атап өтті.
«2025 жылы IT экспортының көлемі 1,1 млрд долларға жетті. Өткен жылы бұл көрсеткіш 690 млн доллар болған еді. Осылайша, бір жылдың ішінде IT экспорты шамамен 60 пайызға артты», – деді Үкімет басшысы.
Сонымен бірге Премьер-министр бұл нәтижеге қарамастан босаңсуға болмайтынын айтты. Оның пікірінше, әлемдік IT нарығындағы бәсеке күшейіп келеді, сондықтан Қазақстан цифрлық экономиканы дамыту және экспорт көлемін ұлғайту үшін белсенді әрі тиімді шараларды жалғастыруы қажет.
