2026-2027 оқу жылынан бастап Қазақстанда су шаруашылығы саласы үшін мамандар даярлайтын колледждер қатары тағы екі оқу орнымен толықпақ. Бұл туралы Adym.kz ақпараттық сайты ҚР Су ресурстары және ирригация министрлігіне сілтеме жасап мәлімдейді.
Жаңа оқу жылынан бастап О.Тұрмағанбетұлы атындағы Маңғыстау индустриялық-техникалық колледжінде «Техник-гидролог» және «Гидрогеология және инженерлік геология» мамандықтары бойынша кадрлар даярланады. Ал Қарағанды облысындағы Теміртау жоғары политехникалық колледжі «Гидротехникалық құрылыс» мамандығы бойынша мамандарды оқытуды бастайды.
Қазіргі таңда елімізде су шаруашылығы саласына маман даярлаумен 8 арнаулы орта оқу орны айналысады. Бұл колледждерде 757 студент білім алуда. 2025-2026 оқу жылының қорытындысы бойынша аталған білім беру ұйымдарын 208 түлек тәмамдаған.
Су ресурстары және ирригация министрлігінің Ғылым және инновациялар департаментінің директоры Марат Иманалиевтің айтуынша, су саласы бойынша білім алып жатқан студенттер өндірістік тәжірибеден «Қазсушар» РМК филиалдарында өтеді. Министрлік осы бағытта маман даярлайтын барлық оқу орындарымен тиісті меморандумдарға қол қойған.
«Биыл су шаруашылығы саласында өндірістік тәжірибеден өтетін студенттер саны өткен жылмен салыстырғанда екі есеге жуық артты. Қазіргі уақытта колледж студенттері «Гидротехникалық құрылыс», «Гидротехникалық мелиорация», «Сумен жабдықтау және су бұру жүйелерінің тазарту құрылыстарын пайдалану» және «Гидрогеология» мамандықтары бойынша білім алуда», – деді Марат Иманалиев.
Министрлік мәліметінше, бұл шаралар су шаруашылығы саласындағы білікті кадрларға деген сұранысты қамтамасыз етуге және саланың кадрлық әлеуетін нығайтуға бағытталған.
